KUIERKIDZ Sê DANKIE!

Met die jaar 2012 wat op sy kop lê wil die beheerraad namens die kinders van die Kuierkidz leersentrum vir Breingestremde kinders graag dankie sê aan Hartbeespoorters wat hul deur die jaar goedgesind was. Meerhofskool en mev. Rita Burgers verdien die grootste dank vir hul onbaatsugtige liefde en diensbaarheid. Hulle het die Kuierkidz uitgehelp met 'n stukkie grond om hulself uit te leef toe daar geen uitkoms vir die sentrum was nie en doen so voort; daarom sê ons dankie vir ons Hemelse Vader vir mense soos Mev. Burgers en haar beheerliggaam wat ons ’n plek gun sonder eise en voorwaardes om ons gestremde kinders te kan bedien.

Dan is daar 'n magdom individue en organisasies wat te veel is om op te noem waarsonder Kuierkidz nooit sou kon oorleef nie; die Kuierkerk en sy mense wat ons aanvanklik op die been gehelp het en steeds hulp verleen, asook die Kormorant en sy personeel wat altyd gewillig is om te help met reklame of beriggewing. Ons het mense soos Yolanda le Roux wat sonder vergoeding drie keer per week inry vanaf West Lake om te help met die praktiese oefening en ontwikkelingsprogram van sekere kinders. Ons onderwysers verdien groot dank wat werk met liefde en geduld en vir ’n relatief klein salaris om hierdie spesiale kindertjies te help om optimaal te funksioneer. Ons sê dankie aan mense soos dr. Hermie Burgers en dr. Cas Olivier wat op ons beheerliggaam dien en kosbare raad en hulp verleen. Diana Reynecke verdien dank omdat sy ons met ons finansies en boekhouding bystaan.

Kuierkidz is 'n niewinsgewende organisasie en is afhanklik van donasies en fondsinsamelings projekte om maandeliks te kan oorleef en sonder elke Hartbeespoorter se goedgesindheid kan ons nie die mas opkom nie. Dankie vir elkeen se oop hand en hart. Hierdie jaar het organisasies soos Jakaranda, Castrol en Dreamteam ook 'n groot poging aangewend om ons kinders te bederf en fondse te bewillig. Dankie daarvoor.

Kuierkidz verdeel vanaf 2013 in drie dele: 'n kleuterskool, skool en 'n volwasse sentrum. Ons nooi graag belangstellendes om op 23 November tussen 15:00 -16:00 te kom inloer en ons kersmark te besoek. Ons spog met ons gestremde leerders se eie handwerk en kersversierings wat ons gaan verkoop.

Dankie vir elke persoon wat ons deur die jare goedgesind was en ondersteun het. Ons dank veral ons Hemelse Vader vir Sy beskerming en liefde.

Groete,

René van Zyl

(Namens die Beheerliggaam van Kuierkidz)       

2012 'n Jaar vol Heerlike verrassings!

Die jaar is nog beslis nie verby nie maar sover kan ons net vir die Here dankie sê vir elke oop hand en elke bietjie hulp wat ons van die gemeenskap ontvang het. Daar was so baie hoogtepunte.

Ons het vroeg die jaar afgeskop met ons jaarlikse Gholfdag by die Brits gholfbaan in Maart! So baie helpende hande en spelers het ons daardie dag geseën met hul liefde en vrygewigheid. Dit was die tweede gholfdag wat deur die vriende van Kuierkidz gereel is met baie hulp van die personeel en ouers. Ons het pryse ontvang van al wat leef en hierdie dae word baie gewild onders Hartbeespoort se inwoners asook heelwat mense van Johannesburg en Pretoria.

Ons tweede groot aksie was die jaarlikse moderne Bybelse Musiekblyspel, King David and his eight wives, by die Kuierkerk op Hartbeespoort! Dit is soos gewoonlik geskryf deur myself (René van Zyl) en hierdie jaar het Doreen Coetzee gehelp met die regisseurwerk en die afrigting van die spelers. Dit was 'n reuse sukses en die spelers wat almal al so goed ken, het hulself goed gekwyt van hul taak. Die sang en toneelspel was uit die boonste rakke. Esmé Walker het soos gewoonlik die dekor hanteer en dit was lieflik. Almal het uit die toneelstuk gestap met 'n beter en meer empatieke verstaan van die rolspelers in die tyd van koning Dawid. Volgende jaar sal ons Koningin Ester aanpak, 'n kleurvolle fees vir die oog wat afspeel in Persië! My vingers juk al behoorlik om te begin skryf. Dit gaan vol humor en aksie wees! Dit sal weer die begin van Junie plaasvind.

Hierdie foto's kom uit die Dawid musiekblyspel by die Kuierkerk. Dit is 'n jaarlikse instelling en winste gaan aan Kuierkidz.








Bruce McKay was die mallerige koning Saul in die Koning Dawid musiekblyspel wat ten bate van Kuierkidz aangebied word.

Yolanda le Roux (links) is 'n groot hulp by die skool en offer so baie van haar tyd op om ons kinders te leer en te help. Jy is 'n engel! Langs haar is Charlie Brits, die voorsitter van ons Beheerliggaam en 'n fenominale vrou waarsonder ons nooit sou klaar kon kom nie! Dankie julle!

Dan was daar in Oktober die aksie wat gereel was deur Castrol Magnatek, Jakaranda en Dreamteam sommer by ons skooltjie. 'n Hele klomp mense het afgekom na ons plekkie en het die hele skool in'n partytjieplek omskep! Die kinders, personeel en ouers is bederf met lekker eetgoed, presente, skenkings aan die skool en almal was gedaan gespeel aan die einde van die dag - ook die personeel van die drie organisasies wat betrokke was! Baie dankie julle almal, dit was groot bederf!

 Die nar van Castrol het sy eerste optrede hier by Kuierkidz aangepak en dit was 'n vuurdoop! Hy het hom goed van sy taak gekwyt en net gelag! Die kinders was mal oor hom. Baie dankie!

Ons sien met afwagting uit na 2013 en die moontlikheid van ons eie perseel en geboue - mag die Here ons goedgesind wees en die balle wat reeds aan die rol gesit is, momentum gee sodat ons binnekort ons skool kan uitbrei na 'n voorskool, skool en na-skool fassiliteit! Prys die Here want hy is so goed vir ons en ons kindertjies!

2013: Hier kom ons!!